தீதும் நன்றும் பிறர் தர வாரா!

எழுத்தாளர் ப்ரீத்தி வசந்த்’தின் பக்கங்கள்

Tell me about yourself என்று நேர்காணலில் கேட்பார்கள். இந்த பக்கம் வரை எட்டிப்பார்த்த உங்களின் மைன்ட் வாய்ஸ்ஸூம் அது தானே. 🙂

நான் ப்ரீத்தி வசந்த்.

திகட்ட திகட்ட தினம் தமிழ் படிக்கும் காதல்க்காரி.

கொஞ்சம் மழையும் நிறைய காதலும் மனதிற்குள் தேக்கி வைத்து கவிதை படைத்துக்கொண்டிருக்கிறேன்.

முடிவடையாத நாளின் எச்சம் கனவாவதைப்போல சொல்ல மிச்சமுள்ள பிம்பங்கள் சில என் சிறுகதைகளாகிவிடும்.

இதற்கிடையில் வள்ளுவனும் ஆண்டாளும் கம்பனும் பாரதியும் எதையாவது படிக்க வைத்து இம்சிப்பார்கள். சேமித்து வைக்க தோதில்லாமல் அவை கட்டுரைகளாக்கி விடுவதுண்டு.

அனுபவமோ ஆற்றாமையோ, பெருந்தாகமோ என் கீபோர்ட் கசிந்தவற்றையெல்லாம் கொஞ்சமேனும் சேகரிக்கும் முயற்சியே இந்த வலைதளம்

எழுத்தும் வாசிப்பும் ஒரு காலானுபவம். தொடங்குதல் மிக எளிது. முடிப்பதென்பது முடியாத காரியம். எனவே ஒரு கூழாங்கல்லினைப் போல கடந்து வரும் வழிகளெங்கும் பண்பட்டு தொடர்கிறது என் எழுத்துப் பயணம்.

கவிதை, சிறுகதை, மொழிப்பெயர்ப்பு, இலக்கியம் பாட்காஸ்ட் என்று இப்போதைக்கு பிரித்து வைத்து என் படைப்புகளை சேர்த்திருக்கிறேன். இன்னும் சிறார் இலக்கிய படைப்புகள், பட்டிமன்ற தரவுகள் சேர்க்க வேண்டியுள்ளது. அதற்கு கொஞ்ச காலம் பிடிக்கும் என நினைக்கிறேன். அதுவரை வலைத்தளத்தில் சேர்த்துள்ளவற்றை படித்து மகிழுங்கள் 🙂

இது நேரம் அவரை வாசித்தமைக்கு அன்பும் நன்றியும். 🙂

சமூக வலைதளங்களில் ஃபாலோ செய்ய கீழே க்ளிக்குங்கள்

அம்மா தெரிகிறாள்..

போன ராத்திரி
கட்டில் தலைமாட்டில் விடுபட்ட
கண்ணாடி குடுவையை
காலையில் வீடெங்கும் தேடியபடி

அம்மா தெரிகிறாள்…

தரையில் காலார
உள்மூச்சு வாங்கும் இசையோடு
உள்ளுக்குள் வாயசைத்தப்படி
தினமலரை புரட்டும்

அம்மா தெரிகிறாள்..

எதற்காகவோ ஏதோவொரு
ரசீதை தேட சென்றவள்
பீரோவை இரைத்துப்போட்டு
இடையில் தட்டுப்பட்ட
பழைய ஆல்பமொன்றில்
மருகி தொலைந்தபடி

அம்மா தெரிகிறாள்..

பழகிய தெருக்களின்
நினைவு அகலாத
கனவு அடுக்குகளில்
சிக்கித் திரிகின்ற
என்னை கவனித்தபடி

அம்மா தெரிகிறாள்..

தூக்கம் கலைந்து
நடுவறைக்கு வந்ததும்
‘பாப்பா.. இத்தன மணிக்கு எழுந்துவந்தா
உடம்பு என்னத்துக்கு ஆகும்’
என்னையே எதிர்பார்த்து முனகியபடி

இன்னமும்

அம்மா தெரிகிறாள்..

-ப்ரீத்தி வசந்த்

Image – Magdalena Wozniak Melissourgaki

    Preethi

    எழுத்தாளர் ப்ரீத்தி வசந்த்’தின் பக்கங்கள்

    தீதும் நன்றும் பிறர் தர வாரா!